新學年又開始！昨日下午大約3時許，身穿灰色T-Shirt、戴上黑超兼藍色帽的「廿四孝爸爸」藝人郭晉安（安仔），現身國際學校門外接大仔郭令山及細女郭以雅放學，記者上前打招呼，安仔即面露微笑兼揮手，問到正攻讀營養學的太太歐倩怡為何不一起接放學？他笑笑口話：「佢今日讀書呀！（所以得你接？）係呀！（係咪最近拍完戲都得閒啲？）最近都得閒。」說畢便轉身行入校門。
幫愛女孭書包
未幾，單肩背着愛女粉色書包的安仔，攬住一個小朋友步出校門，身邊亦有不少小朋友圍住，十足「人氣王」！小朋友同安仔講再見後，安仔先拖番愛女，同行還有女友人和一位白衫小朋友，四人拖住手一字排開，而令山則於後方相隔多個身位。
郭令山勁Cool
安仔再受訪時表示國際學校都會提早開學，此時，身旁的以雅好奇心爆發，一直探頭望記者，仲笑住同朋友仔話：「見到我啦！明星呀！」相當搞笑！
當記者問郭以雅獲爸爸接放學開不開心時，兩父女默契十足互望甜笑、又發出笑聲，之後以雅細細聲怕醜話：「開心。」安仔接住話：「你講嘢啦！爸爸唔講啦。（咁仔仔呢？）阿仔比較Cool。」問到令山獲爸爸接放學開不開心？他微笑冇答，再問到返學開不開心？他即以「麻麻哋」手勢代答，果然Cool爆！
禮貌揮手講再見
五人行到白色座駕前，安仔先放書包於車尾箱，令山就跳上前排坐，而以雅同朋友手拖手上車，臨上車前仲話：「我哋放學一齊去玩」，最後有禮貌向記者揮手講再見，安仔都笑話：「佢遲啲畀你哋影㗎啦！」
(on.cc東網)
