大陸女星吳謹言憑《延禧攻略》大紅，但人紅自然是非特別多，唔少媒體批評佢同工作室團隊派頭十足，最近因為大頭症發作，得罪來自央視嘅嫡子大阿哥《中國電影報導》，答應咗做訪問之後都膽敢放飛機，仲要人哋俾場地費，結果俾官媒喺微博發點名批評，未幾傳出廣電總局口頭通知各大影視公司要慎用呢個演員，昨日再有傳兩部電影傾緊用佢，最後決定易角！
吳謹言嘅團隊開始發覺事件嚴重，開始諗緊點補鑊，日前就安排吳謹言接受訪問，話自己演技差，盡量表現謙虛！佢仲喺訪問話自己係跳學芭蕾舞出身，後來因身體條件唔適合跳舞、經常受傷，先轉去演戲，但好快地，心情一下子由雀躍轉變為茫然。佢又話記得拍第一部戲時，因為點演都表現唔好，導演最後也都放棄話：「哎呀！算了，靠後期剪輯吧！」吳謹言話當時真係好難受。不過事隔咁多年佢演《延》劇其實表現都係好一般，唔少網友話佢演技真係要好好再磨練下。
(蘋果日報)
