有周刊爆料工藤佑采於後台曾拒絕出場做佈景板，令工作人員束手無策。最後幾經幕後人員鼓其如簧之舌係咁曉以大義，最後工藤佑采才肯上台。亦搵咗港姐監製何小慧求證，何稱工藤佑采綵排期間已經唔認真，又指賽前大會已經勸告過佢，搵埋dancers同佢一齊練，但何小慧稱工藤一直keep住hea。
工藤佑采就喺ig回應：「TTv都幾有趣～個處理方法都幾好喎丶我幾時有拒絕過落選之後要上台跳舞？我哋幾個落咗選嘅女仔包括我在內，明明喺後台哭完都上台跳舞！講到好似佢哋束手無策咁！」又寫道：「好辛苦先叫到我上台？唔鍾意我都唔使（抹）黑我0架～ TTv比賽咁多奇怪事情我都冇講出嚟，比賽最後一個星期 要冇跳舞底嘅我哋學四個舞～你期望可以跳到dancer咁。TTv根本就是，佢唔要你丶都唔俾生路你行～」
有網民為其抱不平，工藤佑采怒道：「我認我天生poker face笑容少，可能講嘢仲有啲串 ～但是我做人仲有品格。」、「佈景板原來需要有笑容」、「都冇當我哋係港姐丶Dancer都唔係丶我哋係佈景板。」
其實她的黑面是這樣練成的。工藤身世坎坷，參選時曾稱父母雙亡，查實生父未死，工藤佑采原名大谷美樹，日籍父親來港工作時，認識工藤的媽媽孫秀芸，誕下她後，便拋妻棄女返回日本，自此沒有聯絡。當時工藤才是10個月大的手抱BB。據2009年一宗車禍新聞揭露，49歲的孫秀芸車禍身亡，遺下16歲女兒大谷美樹，工藤自此開始無父無母獨自生活，以兼職做模特兒維生及繼續讀大學，磨練出超凡堅強個性！
(蘋果日報/on.cc東網)
