前無綫藝員岑潔儀（Zoey）喺2012年嫁咗畀馬來西亞富商老公Dixon，二人已經育有一子Damien，今年已經3歲，今年5月岑潔儀公佈再度有喜，認真可喜可賀！
不過大肚婆都有佢嘅煩惱，今次岑潔儀嘅煩惱就係讓坐喇，佢喺IG話：「上次懷孕時，我也跑去搭地鐵看看有沒有人讓坐給當時懷孕七個月的我，答案是：沒有的。更在月台上有人嫌我行得慢，不停在我後面發岀吱吱隻隻的聲音，今胎我又是懷孕七個月去看看有沒有人讓坐給我，答案是：大家自己看。」相中嘅岑潔儀，係企緊。
岑潔儀再寫道:「其實不讓坐沒關係的，但不要跟我搶位子坐嘛。#懷孕大小事」之後佢仲hash tag咗#funnystory #pregnancy #28weeks #大家唔好做低頭族啦 #留意下身邊發生的事情、#可能有公公婆婆需要坐呢。」
之後都有網民分享佢哋大肚嗰嘅故事：「我嗰時大肚都一樣冇人讓。」「我搭巴士也一樣，現在都8個月大的肚都冇人讓位。」孫慧雪亦有留言：「我試過兩次俾人用手推開我，一次仲要撞埋落我肚度！我嗰陣仲要好大個肚！」
近月來關愛座是否「老奉」要人讓位，已經喺網上嘈過無數次。有年輕人工作累了想坐、或身體不適想坐，都要擔驚受怕驚俾人影相擺上網公審，亦有人索性掛個牌喺身，表示自己真係有需要坐，見到都心痛。有網民留言俾岑潔儀謂：「其實你想坐你可以出聲同人講，人哋未必有心唔讓你，有時我唔舒服坐喺度，表面上人哋都睇唔出我唔舒服。」
而岑潔儀就回覆《蘋果》：「最主要係我成段嘅意思係我嘅經歷，都唔係必要讓坐畀大肚婆，唔係一定要，只係有啲人一開門就衝上車，見到大肚婆都要爭位坐，我覺得好好笑，同埋有時我覺得大家唔好做低頭族，留意下身邊嘅事物。都係比較感嘆呢個世界啲人，好唔好都係話你0架喇，只不過係一個小嘅分享。」
其實關愛座之父鄭桂興之前受訪都有講，引入關愛座，原本係想減少長者因為心急落車跌傷風險，所以喺車門附近設關愛座，鼓勵讓座。關愛座原意，從來都唔係留座，乘客各有不同程度需要，關心禮讓才是重點。
