人妻陳敏之為咗頭家，真係捱到幾辛苦都冇怨言。敏之最近幫無綫一連開拍兩部劇《解決師》同《鐵探》，要日以繼夜，夜以繼日咁開工，今日凌晨終於出意外！
唐詩詠今日凌晨喺ig story貼咗一張相，見敏之右邊腳指甲不停流血，紙巾上都染滿血跡，身邊仲有醫護人員協助，而敏之就一邊講電話，一邊檢視傷口，詩詠留言﹕「心痛。」
五個鐘之後敏之再post片，見佢按住傷口，不停話「好痛、好痛」，嚇到一班網民都問佢止咗血未。
敏之今日回覆傳媒時，透露係自己太投入所致。佢話﹕「剛才凌晨拍嘢時整親，嗰場戲太投入，呢排太辛苦、好忙，又唔夠瞓。嗰場戲要我急步走入房搵詩詠，我唔小心踢咗張床，床係木造，腳趾甲就咁爆咗。」敏之話起初都唔知自己流血，仲堅持繼續拍，後來有攝影師建議佢換拖鞋，所以傷勢唔輕，佢話﹕「換完鞋見到成地血，真係愈來愈痛。」
好彩之後都成功止血，敏之回家休息一會，又要繼續開工，佢仲上載囝囝子樂送媽咪出門口嘅片段，見未夠2歲嘅子樂幫手推行李，仲同媽咪一齊坐lift落樓，有咁窩心嘅囝囝，媽咪做嘢幾辛苦都唔緊要啦。
(蘋果日報)
