噚日係楊怡嘅38歲生日，日前已經同老公羅仲謙放閃，同一班好朋友慶祝生日。
今日凌晨楊怡再喺ig出post，今日同佢慶祝生日嘅係第13期無綫電視藝員訓練班嘅同學仔，轉吓眼已經係20年前嘅事，時間真係過得好快。
見到有張美妮、陳少邦、徐榮、楊明、趙永洪、李忠希、傅楚惠等十多人，仲有貴人事忙嘅林峯都喺度呀！
第13期嘅同學仔好多已經離開咗TVB，好似林峯、楊怡、陳少邦、趙永洪等，只有楊明繼續拼搏，力爭上位；而傅楚惠同徐榮就已經做咗人父母。睇番張陣年畢業照，大家嘅稚氣幾乎冇晒，尤其係林峯，依家個樣真係精緻咗好多，轉變好大。
唔少網友都話好掛住《談情說案》嘅「犀利妹」同「Kingsley」，希望佢哋可以再合作。
佢哋不停自拍，林峯仲飲到面紅紅添，就知佢哋玩得幾開心啦！
楊怡留言﹕「相識已是緣份，感恩我們能相遇，相知，相惜，20年的友誼，不容易。13期萬歲，開心難忘的830，謝謝大家#13 #感恩 #幸福 #友誼永固。」
(蘋果日報)
