梁芷珊和前夫羅傑承有個11A女兒Eily，今日（30號）是Eily的16歲生日，梁芷珊話：「約咗佢食晏，送個細結他ukulele畀佢。」問到會否反對囡囡讀書時期拍拖？她坦言：「畀，只要佢鍾意。」
囡囡生日冇特別慶祝，反而日前放榜就慶祝囡囡攞11A。早前芷珊在社交網報喜，指女兒考GCSE/IGCSE獲得11A好成績，包括1A**、9A*、1A (Add Maths)，芷珊留言：「嗰一刻我感覺好安慰，因為最少我唔需要安慰佢。」
芷珊接受《蘋果》電話時話：「佢有個朋友仔出世就識，呢個男仔IB考到45分，兩個一齊大一齊玩，讀書都係好輕鬆，唔使好多補習，男仔嘅媽咪係我中學同班同學，我哋唔係狀元，但兩個細路仔係狀元，好開心。」兩人青梅竹馬好襯，問到是否囡囡嘅男友仔？芷珊笑說：「呢個由細玩到大，我諗佢哋唔會啩，呢個好叻仔，6呎幾高又打籃球，喺學校好受歡迎，我覺得佢哋唔會囉，我個女未有男友。」
究竟11A女兒是如何煉成的？芷珊稱：「Eily國語發音似『愛你』，呢個女我好愛佢，亦都希望好多人愛佢，中文名叫樂桐，因為想佢有一個快樂童年，我諗番自己嘅童年幾快樂，雖然只係小康之家，爸爸係公務員，有兩個細佬，媽咪絕對冇迫過我，更加冇補習，依家咪又好人好姐，所以唔好迫個女，我冇幫個女報幾間幼稚園上下午班都讀齊，只係報間一條龍學校，因為IB課程唔使點考試，記得佢四年班先第一次考試，冇得考試就冇得迫，佢喺學校已經做完功課，返嚟就玩囉，聽歌睇戲，佢好細個開始只係睇英文嘅戲，我諗佢語言基礎打得比較好。」
雖然女兒有11A成績，芷珊強調自己不是怪獸家長：「我真係冇push個女，由細到大只有一個補習先生，只係同佢講英文同國語，放學同佢玩兩個鐘。我都有畀佢學芭蕾舞同彈琴，但同佢講如果唔鍾意，我冇所謂，但你要知道，唔學之後唔會畀你學番，除非你大個自己學，因為我想佢學識對決定負責任。譬如嗰啲贏在起跑線嘅說話，我從來唔認同亦唔入腦，我成日同朋友講要做hea媽，因為我媽咪夠hea，冇栽培過我，佢只要畀好嘅環境我同細佬健康成長，童年好開心，所以希望我個女都係咁囉。」
前夫羅傑承都沒有給女兒壓力，芷珊說：「其實我同羅生都係冇迫個女，我哋一直覺得最重要語言好，曾經喺佢去英國讀書前，叫佢上堂學creating writing，呢個係個女唯一一次補習，上咗6堂。佢一向作文成績都好好，其中一科A**係宗教，另外9科A*包括英文、法文，我都好安慰，我同羅生冇期望佢攞11A*。所以嗰日我同羅生講笑今次係不勞而獲，冇push個女畀佢自然發展，出嚟效果好好。呢個係我教女形式，好細個當佢係朋友，爸爸默默支持佢，所以我同羅生好開心，放完暑假返去讀書，未諗大學讀乜科，將來做乜？完全冇plan，同我以前一樣，我好想大家認真思考，唔好令小朋友成長咁有壓力，冇必要報七國語言，我個女報英國學校乜都唔睇，只睇成績表。」
安排女兒到英國讀書，亦是按步就班地進行，芷珊說：「喺幫佢考學校過程，我冇早幾年籌備報定名或睇學校，只係過去搵一間agent，之後agent提議佢可以報邊間學校，我同佢報咗三間，攞成績過去三間都有offer，結果我哋只去咗一間面試。係咪要好多錢先搵到agent？其實成個過程到我個女入學，agent係冇收過一毫子，我相信agent同啲學校有關連，幫學校做過濾揀學生，所以我相信收費由學校嗰度嚟。」
在保良局擔任總理及副主席的芷珊說：「呢9年睇住教育制度、學校風氣、家長風氣，令到小朋友真係好辛苦，一間學校100個位，有3、4千人去面試，真係好瘋狂，點解有咁多人報名？因為大家都報十間學校，呢樣係冇辦法理解！我將會出一系列書，想搵讀得書好嘅狀元講成長，全部爸媽都唔應該係怪獸家長，想帶呢個意思出嚟。」
(蘋果日報)
