中日混血兒落選港姐工藤佑采，喺香港小姐競選中被「鞭屍」，出局都仲要跳舞暖場搞到佢黑晒面，成為網民熱話。
琴日歌手張敬軒（軒仔）就將IG嘅頭像轉咗做工藤佑采，而工藤佑采亦即刻Cap圖發文。
今日工藤佑采行動再升級，直頭將自己個IG頭像換做軒仔個樣，留言話「呢期潮流興玩交換頭像」，有網友留言問佢係咪鍾意軒仔，又好好奇佢哋係咩關係，但佢只係應咗句「唱歌好聽香港唔多」，睇嚟好欣賞對方。
而軒仔IG就湧入大批粉絲留言，大家都好關心佢同工藤佑采有冇發展機會，有網友更話：「皇上春風滿面#喜事近😁」仲有網友催佢快啲解決終生大事！
此外，工藤佑采仲首次回應番當日「黑面」：「外國都有好多唔同類型嘅藝人明星、唔一定係要笑唔停，我本身冇表情就係咁樣Poker Face，女王的教室天海祐希都係成日黑面，渡邊直美就好搞笑，藝人都唔係一定要得一個類型～」畀網友大讚佢同軒仔一樣咁有趣，仲睇好佢會紅。最搞笑係有唔少網友都跟風用埋同一個頭像，睇嚟大家都好支持工藤佑采嘅真性情喎！
（ig / on.cc）
