應屆港姐冠軍陳曉華、雙料亞軍鄧卓殷、季軍丁子田同友誼小姐陳靜堯喺將軍澳電視城會見傳媒。選完港姐之後，冠軍陳曉華就冇停過，即刻做直播節目，又要同官方刊物影相，返到屋企已經深夜，不過佢估唔到成班朋友同屋企人，等佢返嚟慶祝，令佢好驚喜，搞到朝早6點先瞓，好彩佢今日狀態都算唔錯。
講到被重提同前男友狄易達拍拖時，喺食肆爆粗一事，陳曉華就否認，仲話當年同前度都有討論過，平時自己都唔講粗口，唔會冇緣冇故去講。至於被指「爛口港姐」，佢就覺得網民睇報道會先入為主，但佢自己就睇得好開，最緊要做好自己，同埋當選港姐後，更會小心言行。至於舊愛狄易達有冇祝賀佢，陳曉華就話未有，大家分開後都好少聯絡，或者將來喺電視城會碰到面。此外，噚晚摘冠后時，有指佢疑似走光露底，陳曉華今日就好淡定表示，佢有穿打底褲，咁！即刻應該冇走光。
自曝有男友嘅雙料亞軍嘅鄧卓殷就話同男友拍拖6年，依家對方喺外地讀書，雖然大家分隔兩地，只要互相信任，關係維持得幾好。鄧卓殷仲話返到屋企，同家人食杯麵慶祝，獲雙料獎項，興奮到瞓唔著。對於有網友替佢不值，只攞亞軍，佢坦言冇諗過入三甲，攞到亞軍已超乎想象。至於自己輸畀冠軍邊方面？佢大方讚冠軍陳曉華，表演空上瑜伽出色。另外，有指冠軍陳曉華曾爆粗一事，鄧卓殷表示大家平日相處斯文，唔會講。
至於季軍丁子田表示，打入三甲已經好感恩，自知問答環節答得唔好，亦都冇失冠軍嘅感覺，而佢嘅廣東話，比起初選時已有進步，或會考慮報中文課程。今次參選父母、嫲嫲特登從美國來港支持佢參選，媽咪更成日煮湯同米粉畀佢食。
(蘋果日報)
