藝人陳嘉佳（細細粒）之前憑韓紅Look於十秒內KO兩公升水，令內地觀眾眼前一亮。最近她再下一城，於內地綜藝節目中再晒鯨吞絕技，為了讓所屬隊伍於「美食接對白」遊戲中勝出，她不但一口氣記下並背誦複雜繞口的台詞，更於半分鐘內KO五人份麵量，嚇窒主持及在場的內地演員！雖然是節目中唯一一位香港代表，但她未有因此失色，除了大晒母語上海話外，又在講大話環節晒演技，表現出色。
細細粒事後笑言是次拍攝行程雖然很緊密，但卻很開心能在杭州大歎美食：「我最鍾意食當地嘅串燒，嗰日做完嘢鬼咁肚餓，我就嗌咗啲嚟食，結果畀工作人員鬧爆，話我叫太多。我依家諗番當時食物送到嚟嘅畫面，又真係幾誇張，但係我真係食得晒！當然小朋友冇經過特別訓練就唔好學我啦！而且我係嗌埋畀工作人員，我覺得大家一齊辛苦咗咁耐，請佢哋食飯慰勞番佢哋係最基本。」
(on.cc)
