藝人郭富城與楊千嬅出席新戲的開鏡拜神儀式。
城城表示今次首度與千嬅合作，飾演金融才俊：「我睇劇本時畀劇本打動，我同經理人小美講一定要接，叫佢唔好接其他嘢做住，好耐冇遇過一部香港電影畀我咁深刻體會，相信觀眾會好期待，而且啲演員個個好有份量。」他為該戲到了深水埗、旺角、廟街等拍攝，坦言平時很少到這些地區。
問到千嬅在戲中與城城的關係時，她表示比情侶更複雜，大家同是天涯淪落人：「係講香港貧窮線下無家者嘅故事，我哋每個人代表一個職業，好貼地，我對呢個題材都好好奇，我有去觀摩同實習角色嘅職業。」
除了該戲外，她現正拍攝無綫劇集《多功能老婆》：「我拍劇拍到一半，小美搵我拍電影，我覺得個劇本好有挑戰性，而且又有城城，萬梓良重量級演員，雖然拍劇拍到個人虛虛哋，我都照接。我真係入咗戲，冇瞓過覺，攰到對白都講唔到，城城話有黑眼圈就啱，唔好補妝。」
提到黎明公開了女兒的照片，千嬅見到時即大叫：「好似佢（黎明）！不過依家咁細睇唔到似邊個多啲，啲人初時都話我個仔唔似我，我點都話似我，生得咁辛苦。（同黎明對親家？）控制唔到，自由戀愛。」城城就笑言是開心事，但自己較為低調。
(on.cc)
