羅霖日前53歲生日，接受傳媒訪問表示擔心身體差，加上要獨力養3名兒子，財政壓力大，6年已支出了500萬喺兒子生活及學費身上，而多年來沒收過任何贍養費，都要自食其力。
前夫劉坤銘琴日就發聲明反擊羅霖對佢嘅「零贍養費」指控，當中劉坤銘聲稱，已按照12年的離婚協議及法庭的頒令，作出財產處理，包括房產、現金等資產轉移，並已完成支付給對方所有相關金額。除了金錢糾紛，劉坤銘就指對方涉及誹謗，不滿羅霖以受害人身份自居及以孩子作宣傳，並渴望與孩子建立關係，但就遭到前妻破壞。
剛聯絡到身在大陸工作嘅羅霖，佢指今日星期日，要聽日先會透過律師發聲明，不過佢聽到前夫列出嘅指摘，情緒顯得激動，聲線有點哽咽，表示「有人可以擘大眼講大話」、「自己講大話就畀雷劈」，當中佢最不滿被指控破壞父子關係，佢表示：「我成日都講，男仔係要當爹哋係偶像、榜樣，無論如何，就算唔養你，都係佢哋爹哋，父親節都會提佢哋send message畀佢哋爸爸，係大仔同二仔覺得佢無負父親責任而唔鍾意佢，佢哋有同我講話可以出嚟講番件事，但我想保護佢哋私隱，我同佢哋講媽咪養唔掂，就希望佢哋跟番爸爸，有能力就會接返佢哋返嚟一齊生活，係二仔同佢傾，佢應承咗兩個仔同佢住，之後又經律師要我列出16-18年收入支出畀佢睇。」
羅霖表示多年來，因離婚同撫養兒子問題，要花費大量金錢透過律師周旋，指雙方律師曾建議可以雙方坐底傾，二人同是教徒有同一個牧師，牧師曾建議去搵佢傾，可以用愛化解呢啲問題，不過對方堅持要發律師信，試過一年可以發10幾封信嚟：「好似試過佢話我唔畀細仔星期六、日同佢出街，要發律師信畀我，有時係細仔唔想同佢出街，想同我去玩，同埋佢都有細仔電話，總知佢有好多錢同時間。」
對於劉坤銘指一直都有給兒子生活費，指父母都應當承擔，更在回覆中指：「一直無間斷地支付三個孩子的學費，直至三個孩子完成大學。」羅霖就表示：「大仔、二仔每年在美國讀大學都要每人交50萬學費，未計佢哋生活費，佢係每年畀9萬學費畀每一個仔，而細仔學費就係佢畀，不過其他生活費、學習興趣、睇醫生任何費用都係我負責，呢啲全部都有律師證明。」
針對「零贍養費」言論，劉坤銘講到對方聲明指已根據法庭頒令，已作出財產處理，包括房產、現金等資產轉移，並已完成支付給對方所有相關金額，羅霖就表示多年來都冇物業：「如果有物業，你哋實查到，同埋我唔使要租樓住，佢生意唔好，我借過我多年工作嘅幾百萬積蓄畀佢，甚至要典當手錶，仲有佢冇AE信用卡，我幫佢申請咗附屬卡，嗰啲錢係佢還返畀我。如果我收佢咁多錢，我唔使做得咁辛苦，可以喺屋企湊仔，陪個仔喺美國讀書。」
（apple daily）
