Jason上月剛約滿大台，離開工作12年嘅地方，有指佢為迎接下月來臨嘅小生命，決定全職做湊仔公兼YouTuber。
擁有英國國籍，名校畢業，操英文流利，高大靚仔……咁好條件嘅男人，但入行無耐，陳智燊(Jason)已宣佈封盤，令唔少粉絲玻璃心碎了。
反之，太太宋熙年(Sarah)經常遭受到網絡欺凌，令向來情深嘅Jason好心痛，皺起眉頭話﹕「無論鬧我定鬧佢，鬧你樣衰，鬧你唔鍾意，但冇乜邊樣值得記喺心，嗰下係愕然嘅，但delete咗就算，唔知佢睇唔睇到啦，或者佢都有幫我delete。」
會否反擊？Jason話﹕「好難，有咩可以令攻擊少啲，令大家用一個正確諗法諗呢件事，我都唔知有咩方案令件事舒服啲，好大個問號？但現在都有好多message話Sarah大肚後靚咗，可能母愛浸咗出嚟，都接受咗。」
慶幸Sarah天性樂觀，從未為此流過一滴眼淚，還建議Jason效法美國主持人Jimmy Kimmel拍片自嘲，Jason話﹕「佢話不如攞住部電話，讀番啲刻薄留言。但啲留言有時剩得粗口，完全冇重點，除非鬧番佢，但香港呢個文化我覺得玩唔到，出咗嚟應該『嘩』上C1。」最後Jason同太太決定以平常心面對。
Jason一提起Sarah，臉上總帶著笑容，今次拍攝其中一個地點位處旺角街頭。Jason表示都係為咗太太﹕「成日想帶佢去啲香港特色地方，但佢依家大住肚，唔方便去人多地方，所以好相影啲相返去畀佢睇。」佢透露太太會留港產子，問點解唔去英國生攞英國護照，Jason衝口而出﹕「咁咪好耐見唔到Sarah同囝囝？要去待產，呢排我又要處理自己工作，唔可以陪佢哋，真係唔捨得。」
問到點解咁愛Sarah，Jason咪咪笑話﹕「Sarah選美時冇留意㗎，之後佢加入娛樂新聞台，慢慢熟，佢爽朗率直覺得佢幾正，唔複雜、無機心，相處落就鍾意咗。」Jason自認宅男，所以向來好少桃花，佢笑言﹕「拍劇宣傳嗰啲有，每部劇都有，嗰時未公開(拍拖)，啲女拍檔全部都係吹水。」
（apple daily）
