聽日（27號）就正式31歲嘅前港姐冠軍，撻着擁逾億身家老闆級男友，今個月頭佢就玩自爆，喺社交網晒出拍拖相，話係人生中第一次放閃，搞到大家都估佢哋係咪好事近。
自放閃後見親人都會不自覺提起男友，又會分享佢哋拍拖拍得好Sweet，而琴晚（25日）佢同大班好友飯局，男友Benny都同佢黐到實一實，更加係男主人咁坐隔籬，都咪話唔煙韌，直頭好似一對新人咁!
雖然佢哋就冇咩親密舉動，不過就勁有老夫老妻Feel，仲滿場飛添！
成個場面好似去飲咁，真係好似擺緊酒！陳庭欣（Toby）同大家舉杯時，Benny就喺佢身旁做佢「背後的男人」，望住女友微微一笑，眼神中嘅愛意，真係擋都擋唔住！
Toby今次當然都捉緊機會同男友示愛，喺社交網上載大合照，更直接嗌男友做「我的honey」，嘩，簡直係旁若無人！Toby寫道：「多謝咁多位兄弟姊妹陪我預祝生日，特別係我的honey 🍯♥。。。愛死你哋😘😘😘 」
(on.cc)
