現時懷孕近8個月嘅佢今日喺鰂魚涌出席「慈善親子烘焙樂」，同場仲有何傲兒、楊埕同瑪姬，以及同芯慈善會邀來12個低收入家庭嘅小朋友，一齊跟藍帶麵包師傅學整麵包。
佢表示：「我之前唔鍾意食澱粉質，但有咗BB之後， BB好鍾意食麵包，今日都係我第一次學整麵包，師傅讚我有潛質，我諗我會繼續。」蔡一鳳亦大讚現場小朋友學嘢好叻，提到BB快將出世，會唔會諗定咩課程？佢笑住話：「BB嘅嫲嫲已經諗好邊間幼稚園，因為佢識咗幼稚園嘅院長，可能BB 8個月就要讀托兒所。」
提到早前老公盛品儒受訪時，被問到呢胎係仔定女，佢當時故作神秘咁話有男有女，蔡一鳳笑問：「佢係咪咁講㗎？保持神秘啦，好快，10月中就知，我都想 一次收工，（孖胎？）我個肚都似，其實都好重，我諗嚟緊一個月，我個肚會越嚟越大，BB用品都有買，買咗中性顏色。」
佢透露聽日要飛東京做珠寶展：「醫生出咗張醫生紙畀我先上到飛機。」
講到盛品儒曾揚言就算怕血，都會陪入產房，蔡一鳳好愕然咁話：「嘩，我建議佢唔好，佢入去暈低咗，都唔知救邊個，同埋我會開刀，因為我怕痛，好驚生嗰一刻，我有個朋友痛咗12個鐘，最後都要開刀。」
(綜合報道 / apple daily / on.cc)
