古天樂今日喺灣仔會展出席「第十六屆世界傑出華人獎」頒獎禮，獲許冠文同楊受成頒世界傑出華人獎殊榮，以表揚佢嘅卓越貢獻，著名鋼琴家劉詩昆亦係得獎者之一。
古仔喺台上領獎時顯得緊張，台下引來哄動，古仔覺得獎項別具意義，事實上都有啲緊張。問佢下一步係咪向博士進發？古仔話：「冇諗咁多，做自己認為做到嘅事，得到呢個獎項已經喜出望外，最重要對得住個獎項，繼續貢獻社會。」有傳古仔喺大陸建第100間學校，佢一聽到就話：「唔回應，關於慈善一向好低調，有能力就會繼續做。」（相關新聞：https://goo.gl/5rYcis）
古仔話今次得獎冇特別慶祝，稍後還要工作，而佢主演嘅新片《犯罪現場》會喺今個星期殺青，佢話：「前幾晚拍通宵，有啲攰，踏正農曆七月十四喺亂葬崗開工，過往做電視台或拍電影都好，出郊外拍嘢都會燒嘢食，今次劇組人員就話唔好，驚好多人一齊食，當晚對眼都唔敢通處望，驚唔知會望到啲乜嘢，平安度過咗拍攝。」不過古仔之前拍開《陰陽路》，應該對呢方面好有經驗，佢講笑話：「唔通拍特工戲多就身手非凡咩？咁多年都冇遇過啲古怪事，只係聽多。」
佢表示之後都要宣傳其他電影，可能只得一、兩日放假，但本身熱愛工作，就算放假都在想工作的事，很難停下來。佢笑指今日來領獎都當放了半日假，今年亦未放過長假，記者話佢係公司老闆，可以批自己放大假？佢笑話：「一陣返去填假紙，睇吓個條友批唔批。（即是邊個？）我囉。」
(apple daily)
