47歲鍾麗緹早前宣佈再有造人計劃，其實佢與兩任前夫共育有三女，跟36歲第三任老公張倫碩結婚兩年，暫未有所出。鍾麗緹最近就喺微博撰長文，自爆正積極努力備孕，甚至嘗試做試管嬰兒，希望跟老公誕下愛情結晶品。
鍾麗緹稱：「對於我身體條件來說，不得不承認，並沒有想像的那麼容易。我其實已經備孕半年了，可能因為藥物影響了荷爾蒙或者內分泌的問題，身體會有一些變化，但並不是你們所看到的表象，鍾麗緹因生活無節制，對自己無要求而變老變胖了。」
年近五十，要再懷孕確不是易事，但鍾麗緹一直努力中，包括勤做運動、做Yoga，又做針炙同按摩。之前鍾麗緹係茹素，不過佢擔心對BB健康唔好，於是改變飲食習慣，多食蛋白同水果。
鍾麗緹做咗好多資料搜集，決定去美國接受人工受孕，老公亦贊成，但大女Yasmine就有不同看法。今日有周刊報道稱，二十歲嘅大女有少少擔心，如果媽咪真係再生BB，年齡上差距會遠咗啲。但另外兩個女就好鍾意小朋友，好期待多個細佬或者妹妹。
咁呢位勇敢媽媽又點睇呢？佢接受周刊訪問時就話，佢係唔會Set個限期俾自己、即係例如「五十歲之前要生到」嗰類。換言之，係無限期努力！
之前傳佢要努力造人係因為夫家有壓力（張碩倫係獨子），鍾麗緹解釋番，想生BB，係因為佢兩公婆都好鍾意小朋友咋！
(蘋果日報)
