藝人孫慧雪（雪雪）上年7月誕下囝囝Riley，自此一邊工作一邊照顧囝囝，不過日前佢突然有感而發，喺社交網控訴男人嘅不是：「有時候覺得，做女人真係好難，太蠢又唔得，太叻又唔得；太懶又唔得，太上進又唔得；太肥又唔得，太瘦又唔得；太林（腍）又唔得，太惡又唔得；太醜又唔得，太靚又唔得！但相反，女人就要識得包容！男人，收皮啦！ #深夜有感」
點知佢呢番說話引嚟網民正反兩面嘅評價，有人認同佢講嘅嘢，亦有人覺得佢咁講對男人唔公平，結果引起罵戰！
而女星林芊妤（Coffee）都有留言話贊同雪雪嘅講法，但有網民就毫不客氣話佢咁做又想博Like！有網民更留言反駁雪雪：「做男人仲難，唔可以窮，唔可以矮，唔可以醜，唔可以爛口，唔可以冇學識…但相反，同女仔約會仲要男俾（畀）錢，但女仔仲成日講男女平等。」
而雪雪亦好有耐性回覆網民，仲好無奈咁話：「做working mom真係好攰，返屋企可能仲要俾（畀）人怨做得唔夠！吃力不討好！」
未知係咪網民反應太熱烈，雪雪今日又再上載露膊照，似意有所指咁留言話：「最近好像有點混亂，經常做錯決定～要和自己的內心多一點溝通！」
經過連日嚟嘅「網上討論」，大家都猜測雪雪係咪同老公鬧咗交呢？
(on.cc東網)
