28歲嘅余德丞，本月8日喺西營盤踢波時突然昏迷入院，仲送咗入瑪麗醫院深切治療部搶救，情況一度令人擔心，好友們紛為佢集氣，加上佢年青，意志力強，本月14日，余德丞已轉到心臟護理部及心臟專科病房觀察！
估唔到好消息陸續有嚟，余德丞日前喺鄧佩儀嘅Ig留言後，本月21日亦透過社交平台錄音報平安：「我今次真係好好彩，非常之感恩，非常之開心，今次可以大步檻過醒得番，可以再同你哋講嘢，所以真係好多謝香港每一位嘅關心、問候、祝福同埋集氣，令到我能夠醒得番，真係衷心多謝你哋每一位。」。
余德丞情況一日比一日好，但醫生仍建議佢要留院多觀察一段時間，佢一日未出院，佢家人都會擔心。
昨晚6點45分左右，記者發現余德丞媽咪出現，冇戴口罩嘅佢攞住一大袋飯餸，應該為囝囝送晚餐，記者上前影相，余媽媽顯得愕然同避忌，佢匆匆走咗入病房，可能仍然要為頻撲出入醫院，余媽媽臉上略顯倦容。
(蘋果日報)
