佘詩曼最近憑內地宮鬥劇《延禧攻略》飾演嫻妃，而人氣急升。阿佘要經常中港兩地飛，但噚日仍抽空與好姊妹相聚，因為聽日就係周家蔚嘅35歲生日，難得集齊「七姊妹」佘詩曼、文頌嫻、湯盈盈、梁靖琪、姚樂怡同鍾麗淇一齊慶祝，大家都係蛋糕前影番張合照留念。
家蔚留言﹕「我們走在一起！聊的永遠都是開心事！永遠都只想大家越嚟越好！大家一齊長大！有你們的愛！我多麼的幸福！#感恩 #七姊妹」
佘詩曼入行後首次演奸角，由不問世事嘅嫻妃至陰險皇后，演技備受考驗。其中一幕令人印象深刻，嫻妃勒死嘉嬪時沒有半聲嘶叫，沒有烟熏妝，只係透過眼角眉稍微嘅變化，就將狠毒一詞表現得淋漓盡致，唔少網民都大讚阿佘「連手指都是戲」。
不過，近日就有內媒指《延禧》劇組亦曾經考慮過胡杏兒、胡定欣及楊怡等港星演「嫻妃」一角，最後揀咗佘詩曼係因為平靚正好抵用，傳聞劇酬只係200萬人民幣，比起女主角吳謹言嘅500萬人民幣少一半有多。
《延禧》製作人兼監製于正就否認只係睇錢，反而係欣賞阿佘演技，佢話﹕「佘詩曼是我入行後第一部劇的女主角，覺得她無論外形和內地戲都能演好嫻妃。」
(蘋果日報)
