藝人湯洛雯（靚湯）以密實秋冬裝造型出席活動，受訪時講到與羅天宇分手五個月後，身形日漸脹爆，她謂有留意報道：「我由細到大都有啲肉哋嘅，睇到輯相都肉肉哋，特別係嗰Pat pat。（真係肥咗？有冇磅重？）咁又冇磅，但都係脹脹哋嘅。」
靚湯續解畫話因為之前同朱千雪去日本拍《3日2夜》，之後又同閨蜜莊思明、彭慧中去越南旅行，都食唔少，期間仲自爆有「艷遇」，對一男子一見鍾情，冧笑話：「喺酒店Reception（接待處）有嗰男仔好靚仔！我哋3個女仔去問嘢，都忍唔住話佢好靚仔！（有冇影相、拎電話呀？）冇呀！我唔會做主動嗰個，但如果佢有心搵我都可以Check我哋住邊間房嘅。」
之後會減肥？靚湯話飲食上會多加注意：「不過有啲朋友話輯偷影相都幾靚！哈哈，都係自己呃自己！（會做吓運動？）以健康為主啦，女仔又唔係一定話瘦先靚，有啲肉哋都OK嘅！」
(on.cc東網)
