65歲盧宛茵（Madam Lo）喺大台劇《BB來了》扮演野蠻奶奶，演技大爆發，備受觀衆讚賞。現實中嘅Madam Lo 婚姻失敗，同前夫新聞主播何鉅華離婚後，獨力湊大兩子一女，兩子早已成家立室。
《BB來了》劇照
唯一嘅女兒今年33歲，日前兩母女現身金鐘，被讀者爆料，Madam盧經常被人話同衛蘭撞樣，原來女兒更曾經被認錯係衛蘭！
女歌手衛蘭 （資料圖片）
馮先生接受訪問表示：「佢哋邊行邊傾，好似講緊手機app，盧宛茵問個女app點用，兩母女驟眼睇幾似樣，個女身型肥少少似阿媽。」問到女兒似唔似衛蘭？馮先生話：「都似㗎。」
Madam Lo 女兒 （讀者提供圖片）
之後兩母女分道揚鑣，Madam盧就獨個兒搭港鐵往柴灣方向，坐低後不停玩手機，問到係咪有人讓座畀Madam盧？馮先生表示：「車廂有吉位，冇乜人認到佢，見佢真人白頭髮都幾多。」
之前Madam盧曾公開兩個兒子全家福，但女兒就好少曝光，生得肥肥白白嘅Madam盧，同衛蘭嘅五官幾乎倒模；而從馮先生提供短片所見，都係面圓圓眼大大，着低胸衫身材仲好好㖭，而身型就同媽咪一樣咁圓潤，Madam盧傾到手舞足蹈同女兒感情好好。
（讀者提供圖片）
對於女兒被指似衛蘭，Madam盧喺電話表示：「佢都試過畀人認錯係衛蘭，幾年前有學生妹以為佢係衛蘭，搵佢簽名㖭。」Madam盧話女兒未結婚，兩母女一齊住，嗰晚約埋去街食飯。至於女兒教用手機app，Madam盧話：「我玩吓遊戲，有時有啲嘢我唔識，佢教我。」
（盧宛茵提供圖片）
（apple daily）
