「無綫男神」余德丞（Dickson）早前踢波暈倒，幸經過一番搶救與治療，最終平安無事。
Dickson首度喺社交網發文更新，向大家報平安，感激大家一直來嘅關心：「係呢段日子，好多謝全香港，你地（哋）每一位，既（嘅）關心問候祝福同支持 ，希望可以快啲出院食餐好同飲珍珠奶茶」
最後佢仲引用偶像陳奕迅歌曲《今日》其中一句歌詞「抬頭吧黑暗過會是晨曦」感謝大家！佢嘅圈中好友龔嘉欣、胡鴻鈞、羅天宇、何等亦有留言送祝福！
對於余德丞首度開腔報平安，前華姐冠軍鄧佩儀接受訪問時表示：「知佢冇事非常開心，佢件事咁突然，當時真係好擔心，都見佢喺IG放相，大家都可以安心，事發後都令我覺得人生無常，要特別珍惜家人，今日真係唔知聽日事。」
鄧佩儀表示等余德丞復原會請他飲珍珠奶茶，她說：「佢醒番第一時間喺我IG留言，因為我哋都好鍾意飲珍珠奶茶，凡係珍珠奶茶控都會明白。」
(on.cc東網)
