賭王千金何超蓮跟台灣歌手吳克群分手後，裙下之臣停不了，繼霍啟山、方力申、楊受成細仔楊正龍、強國富二代劉根森後，最新上榜嘅護花使者係成龍之子房祖名，有傳媒影到祖名現身超蓮開設嘅牛肉麵店，與嬌俏老闆娘四目相投撐枱腳。
祖名數年前在北京涉毒被捕，獲釋後返台灣重過新生，好耐冇嚟香港嘅佢，日前現身銅鑼灣與超蓮蜜會，兩人邊食邊傾好開心，老闆娘超蓮着側門大開衫露tube top，性感迷人，兩人食飽飽後，祖名更做柴可夫送超蓮返屋企。
對於被傳媒影到與祖名撐枱腳，超蓮回應《蘋果》表示：「感謝祖名大哥來我的牛肉麵店捧場！玖五牛肉麵真的很好吃的喔。」乘機幫店舖賣廣告。
去年祖名在ig晒超蓮合照，已經力撐超蓮有份搞嘅「一起微笑」慈善組織，當時超蓮留言回應：「感謝大哥」，睇嚟兩人似係兄妹情，有網民留言話佢哋「超配」，但亦有網民話：「當哥的味道」，唔知經過時日洗禮，呢份兄妹情有冇機會變做男女之情呢！
(蘋果日報)
