28歲大台新男神余德丞月初因踢波昏迷被送入瑪麗醫院，情況一度情況危殆，一直留在深切治療，經過醫生診治後，情況已經好轉，其後轉到心臟科病房觀察！
繼日前余德丞喺鄧佩儀(Gloria)嘅ig留言後，今日余德丞透過社交平台錄音報平安，佢話：「我今次真係好好彩，非常之感恩，非常之開心，今次可以大步檻過醒得番，可以再同你哋講嘢，所以真係好多謝香港每一位嘅關心、問候、祝福同埋集氣，令到我能夠醒得番，真係衷心多謝你哋每一位。」
佢仲話：「其實醒番之後先知道原來件事幾嚴重，因為我昏迷時候，原來個心都停咗一段幾長嘅時間，所以能夠企得番身，同大家傾偈真係好好彩，o依家我慢慢康復，精神都好咗多好多，講嘢都清楚咗，當然，醫生都建議要留院多一段時間， check清楚身體係咪ok先可以出院，最後真係好多謝瑪麗醫院嘅上上下下咁多位醫護人員，佢哋悉心嘅照顧，同埋喺我關鍵時候，做心肺復甦嘅足球隊隊友，仲有屋企人每日都嚟支持，公司嘅同事同咁多位傳媒朋友，希望可以快啲出院同大家見面，有乜嘢新嘅消息，再通知你哋。」聽到余德丞把聲中氣十足，今次真係鬆一口氣！
(蘋果日報)
