李亞男上月宣佈懷孕成功後，今日穿上藍色薄絲長裙，配上一吋多粗踭鞋，精神奕奕現身沙田為梳化店擔任揭幕嘉賓。
亞男身形同面形未見走樣，佢笑指有時自己也忘記腹中BB，不自覺地越行越快，而平日都有行公園做運動令身體再強壯，而老公王祖藍都很放心自己，冇過份管束，問到祖藍會否陪伴戒口？亞男話：「我都會陪佢食刺身，因為佢好鍾意食，但係佢會同我講話啲刺身過咗期，臭嘅，好難食。」
亞男話懷孕至今身體未有出現嘔吐情況，只是初期較攰易眼瞓，相信BB都吸取好多營養：「最近開始感覺到BB有少少郁。」問到係咪已經懷孕5個月？佢話：「過咗4個月。」至於性別就稍後公佈，但通常大家指頭一胎係女會似爸爸，如果係仔就媽媽，亞男話：「佢啲基因咁強，好難講啦今次呢單嘢，好驚！」問到好驚係咪對BB性別有所暗示？亞男就話：「唔係，係我好緊張。」
至於李亞男身邊班好姊妹如鍾嘉欣提議自然分娩較好，亞男自認超級怕痛，但又知道自然分娩復原快，加上自己骨架大應該易生，現時仍思考當中，問到祖藍係咪已答應陪伴入產房？亞男透露：「呢個都係考慮嘅其中因素，因為如果我穿羊水時候，爸爸喺台上做嘢，咁我就會好失望；若果係開刀，咁爸爸就可以請假，所以爸爸個期都好緊要。」
(蘋果日報)
