藝人鄧麗欣（Stephy）、陳庭欣及柏天男到深水埗出席電影《L風暴》活動，與Fans玩遊戲。正跟台灣男星邱勝翊（王子）熱戀的Stephy，在台上將「拍得愛情片多」講錯成「拍得拖多」，即尷尬𢱑頭，引來全場大笑。
之後受訪時，她自嘲由於太早起身，所以條脷仍未熱身，而並非因為最近生活太Sweet。講到昨日七夕網上post和王子遮面的合照放閃，她說：「其實係咁啱，我以前情人節都會發啲post祝大家快樂，只係依家嘅狀態畀人覺得更sweet，但我唔係特登。（你哋有冇慶祝？）冇呀！所以post吓相。（你留言叫大家放低手機，係咪有感而發？）唔係講任何人，係覺得情侶之間都要珍惜對方。」
講到她的Instagram刪除了所有朋友，個人帳戶只留下王子一人，非常專一。她解釋：「其實之後會Follow番其他朋友，因為想控制Follow嘅人數，一直未有時間整理。不過好多朋友話我最近放閃太多，話就嚟甜到糖尿，其實我唔係刻意，係咁啱有啲節日。我都有post好多其他工作，可能之後要控制吓，停一停。（享受網上晒恩愛？）我冇刻意隱瞞，網上係share自己生活嘅平台，都係想開心share吓啫！」
戲中Stephy飾演一名私影模特兒，她表示接戲前並不認識這種工作，要做一些research。問到是否要扮得更年青？她笑說：「我諗做私影又冇年齡限制嘅。（使唔使好性感？）都唔算，最多係Bra Top露腰。導演都唔想太過誇張，因為其他男仔都着晒西裝，唔想我太跳Tone。」
(on.cc東網)
