林芊妤（Coffee）、楊柳青噚晚到中環，祝賀前落選港姐林慧倩投資6位數字開嘅餐廳開幕，佗緊8個月BB嘅Coffee着住露肩裙，襯平底鞋現身。
佢急不及待讚自己：「我好乖唔着高踭鞋，B仔就快8個月，之前胎盤前置，每個月都覆診，早排太操勞，胎盤未上返去，醫生話咁樣好易會出血，比較危險，原本想同老公去旅行，都要打消呢個念頭。」
為咗BB安全同自己健康着想，Coffee明白有啲嘢需要犧牲，雖然老公翟志榮（Weng）近呢兩個月較得閒，佢話：「我自己嘅工作都cut咗好多，係想趁呢段時間去旅行，因為BB出世之後就冇二人世界機會，本來想去土耳其或澳洲。」
講到生B準備功夫做成點？佢就開心話得到好多贊助，BB床同必需品都齊晒：「之前搬新屋，因為大肚婆有避忌，所以老公負責搬，我就返娘家住，好多嘢仲未執，下個月又要上育嬰班，已經搵咗陪月姐姐。」
(蘋果日報)
