內地宮鬥劇《延禧攻略》喺中港台三地掀起熱潮，其中最令人期待嘅就係「嫻妃」佘詩曼同「魏瓔珞」吳謹言嘅大鬥法。
不過就有網友發現，原來阿佘同呢位天敵「魏瓔珞」早有淵源，佢哋喺11年前曾經碰頭，當時仲要係交心嘅好姊妹，相隔多年竟然「反目成仇」，認真估佢唔到！
其實「魏瓔珞」呢個角色喺歷史上嘅原形就係孝儀純皇后，而呢位皇后曾經喺無綫劇集《鐵咀銀牙》之中出現過，不過喺劇中就唔係叫做「魏瓔珞」，而係叫「儀貴妃」，當時係由藝人陳敏之飾演。本來歷史人物喺不同劇集出現並唔出奇，但值得一提嘅係《鐵》嘅女主角正正係阿佘，不過佢就唔係飾演「嫻妃」，而係飾演女狀師「納蘭青青」。
喺《鐵》入面，陳敏之曾經偷走出宮淪落妓院，而阿佘就女扮男裝同佢「共度春宵」，二人之後仲成為咗交心嘅好姊妹。《鐵》劇播出時好評如潮，帶挈阿佘人氣急升，如今佢再因為《延》劇成為熱話，睇嚟「魏瓔珞」真係為阿佘帶來好運。
唔少網民就大讚阿佘即使相隔多年，但靚樣都冇變過，就算拍住90後小花吳謹言，都一樣咁搶鏡。
網民有話兒：
余xxxxx阿璇：阿佘多年來都沒有變過，還是那麼漂亮！
chenxxxxxnstar：唔知如果陳敏之做瓔珞會點呢haha
中xxxxxx的人：當年我超愛納蘭青青的～
12xxxxBW：阿佘嘅古裝真係無得輸
(on.cc東網)
