一個男人嫁唔嫁得過，有好多準則，大S就喺大陸節目《幸福三重奏》以身作則，以經驗教一班姊妹。
大S日前喺節目入面話自己唔特別鍾意食蝦，因為唔鍾意剝殼，仲話阿媽教落：「從小到大吃蝦都是爸爸剝，自從爸爸不在後，自己就不吃了。我媽就說『吃蝦一定是要男人幫你剝』」令到包括佢老公汪小菲在內嘅3位男士，都即刻幫老婆剝蝦。
節目出街後，大S已經解釋只係想藉住剝蝦呢個過程，觀察下老公有幾體貼。不過有就人搵番一條6年前嘅微博，原來大S就話過好鍾意剝蝦：「本人不吃蝦，但超愛剝蝦給人吃。我想第九禁區的蝦人一定很恨我吧。」
對比兩次說法，唔知大S係喺6年內轉變咗，定係為咗節目效果變到唔鐘意剝蝦呢。至於呢句「剝蝦論」名言，有人批評大S公主病，但汪小菲一啲都唔介意，仲喺微博護妻，話大S為自己生咗好健康嘅小朋友，剝蝦咁小事，老公幫老婆手都好應該。汪小菲仲好寸咁反擊，話有啲人要照顧兩老，又要做家務，仲要驚咗老公唔敢提出一個小小嘅剝蝦要求，應該好好咁檢討下。
(蘋果日報)
