今日8月17日係七夕情人節，唔少藝人都趁機放閃，喺台灣就有天王周杰倫（周董）喺Instagram上載攬實老婆昆凌嘅合照，點知甜到「漏」低個仔「小小周」，留言淨係講個女「小周周」同昆凌：「大家七夕情人節快樂 也祝我的老婆跟前世情人 情人節快樂」，唔少網民都嘲佢「你忘了還有一個兒子嗎？」、「兒子又被遺忘在角落…」非常搞笑！
而甚少晒恩愛嘅林心如都喺微博晒出同老公霍建華嘅Sweet爆合照，留言：「七夕.快樂 ❤️ 」！相中嘅霍建華箍實老婆仲咀爆對方面珠，而心如就笑晒口望住鏡頭，真係閃死人喇！
仲有天團S.H.E成員陳嘉樺（Ella）都加入戰團，佢上載同老公賴斯翔合照，不過佢就冇周董咁冇心肝，冇唔記得個仔勁寶同埋個「女」（愛犬布丁），佢話今日老公同布丁陪佢開工，囝囝就留喺屋企同阿姨過，不過佢出門前囝囝送飛吻畀佢，冧到佢暈呀！
(on.cc東網)
