洪欣嘅強國老公張丹峰早前被大陸網友爆佢背妻偷食經理人畢瀅，洪欣同張丹峰都先後為事件澄清，事件曝光後，《蘋果》就影到洪欣同張丹峰帶埋囡囡去銅鑼灣行街街，以行動闢謠，力證婚姻冇問題。
噚日係洪欣同莫少聰所生嘅囝囝張鎬濂嘅18歲生日，繼父張丹峰就喺微博貼咗佢哋一家四口嘅慶祝相，再一次以行動證明佢哋一家生活得好幸福，並未受到之背妻偷食嘅報道所影響。張丹峰留言話：「18歲生日快樂，我的乖兒子！從今天起，你要做一個有擔當的男子漢，為自己的夢想努力奮鬥吧，你是爸爸媽媽的驕傲，加油！」
雖然張鎬濂並非張丹峰嘅親生囝囝，但係佢一向都好疼錫鎬濂，今年5月張丹峰亦有抽空出席鎬濂嘅中學畢業典禮，當時佢亦留言話：「未曾錯過哥哥每一個重要的時刻，中學畢業啦！從幼兒園，小學到中學怎麼感覺一眨眼就過了，時間的去哪了？哈哈，還好我們都沒老。」果然係一個絕世好爸。
(蘋果日報)
