要小朋友戒奶對好多父母嚟講都係一大挑戰！好似台灣女星賈靜雯咁，雖然有湊小朋友經驗，不過要幫啱啱3歲嘅二女咘咘戒奶都搞到頭都大埋，仲畀媽咪話佢殘忍！
賈靜雯喺微博發文話咘咘對飲奶樽有太大嘅依賴，喺佢3歲前一個月不斷鼓勵，希望佢可以戒奶成功，而咘咘喺媽咪不停灌輸之下，亦都承諾咗正日生日就會戒！雖然咁講，不過去到生日咘咘因為冇得飲奶即場崩潰爆喊，賈靜雯狠下心腸堅持唔畀，抱住囡囡不停同佢解釋，喊咗一段時間，阿媽都頂唔住出嚟睇吓發生乜嘢事，知道咗原因之後，阿媽都話賈靜雯殘忍！
不過佢仍然冇放棄戒奶行動，佢解釋咁做係想囡囡明白做人「講過就要當真」，唔可以隨便開口承諾自己做唔到嘅嘢，佢仲係社交網問大家對佢咁做有乜意見，唔少網民都留言讚佢做得好，話小朋友就係要從少教育誠信嘅概念！
(on.cc東網)
