「心中總一直記住一句說話，嗯。懂了。『就是專注於眼前該做的』，mi抓緊了這字說話的意義。聽她分享當年是如何每天。。。」
今個星期日(19日)就係鄭秀文(Sammi)嘅46歲生日，噚晚佢就約咗今日40歲生日嘅昔日「跳水皇后」伏明霞一齊慶祝生日，Sammi就喺ig度貼咗佢咗慶祝生日嘅相，佢話好多謝朋友每年都會安排佢同小伏一齊慶祝生日，Sammi仲話：「人大咗，唔洗咩狂歡，簡單食餐飯已經好感恩。」
即將踏入46歲嘅Sammi，同伏明霞一齊慶祝生日，佢仲講到自己好記得對方與她的一席話。Sammi話：「心中總一直記住小伏（Michelle) 跟mi分享的一句說話。她說：『我當刻什麼都不去想，只儘全力把眼前的一跳跳好。』結果，她再奪下了當年的奧運跳手冠軍。嗯。懂了。『就是專注於眼前該做的』，mi抓緊了這字說話的意義。聽她分享當年是如何每天操錬(練)和克(刻)苦， 實在太有意志和堅忍，相對她的毅力和付出，mi只能說我仍得好好加把勁，繼續努力。」
另外，Sammi將於明天推出精選專輯「Believe in Mi」，佢仲話自己就快46歲，直到o依家仲可以為大家唱歌，係一種幸福同幸運喎！佢亦相信擁抱住「相信自己」呢四個字，就能喺心中生出力量，讓自己喺唔同階段拼發出一個又一個新的自己！
今次Sammi揀咗喺花園拍唱片封套，佢話因為自己最愛自然陽光：「我都鐘意花草樹木，而且想搵一個自然環景拍攝，今次啲衫係都有啲啲性感，係女性化中有啲中性感覺，無論著咩都好，係要將自己風格放入去，唔係衫『稱』住個人走，而係人帶住件衫嘅感覺出嚟，今次啲服飾組合我好鐘意，係我自己腦中係有啲槪念，各方面都配合得好好。」
至於服飾同化妝，Sammi都著重自然感覺，佢笑話：「我想拍出嚟有皮膚質感感覺，所以事前要好好咁保養皮膚，做咗好多功夫架！」
(蘋果日報)
