峇里島，一個靚景嘅好地方，仲係鄭嘉穎同陳凱琳、霍建華同林心如、劉愷威同楊冪等星級夫婦舉行婚禮嘅「吉祥地」，嚟緊，可能再多一對星級夫婦都會喺峇里舉行婚禮。
講緊嘅係現年43歲嘅台灣女星賈靜雯，佢同男星修杰楷喺2015年註冊結婚以來，一直未舉辦婚禮，而佢哋婚後先後生咗兩名寶貝女，分別係3歲嘅「咘咘」及1歲嘅「Bo妞」，加上修杰楷前年去當兵，可能因為呢堆原因，令佢哋一直未有時間搞婚禮。
賈靜雯雖然喺2005至2010年間曾與孫志浩有過一段婚姻，但賈靜雯今年3月出席婚紗活動時，亦曾透露自己私下未試過着婚紗同舉辦婚禮，但佢話老公修杰楷叫佢唔好問，要等驚喜，所以佢對婚禮係充滿好奇同期待。而修杰楷亦多次公開表示，一定會舉行婚禮。
不過，賈靜雯終於唔使再等，日前有傳修杰楷將於11月24日喺峇里島補辦婚禮，而賈靜雯喺今年6月更帶同佢同孫志浩所生嘅女兒「悟恫妹」先行到峇里睇場，所以當台灣《蘋果》向佢求證時，賈靜雯只哈哈大笑話：「謝謝大家這麼關心我們的婚禮。」並未否認。
消息指，賈靜雯同修杰楷嘅婚禮將搞4日3夜，女方好友高圓圓將出席，而婚禮已有名牌、珠寶等贊助，亦有大陸平台全程側拍獨家轉播。而賈靜雯嘅經理人對婚禮傳聞回應稱：「謝謝大家提醒，這件事講得也很久了，一直都在計劃當中，時間都還沒訂，工作很忙，還是會辦，看大家有空的時間。」
賈靜雯近年帶住佢同修杰楷所生嘅兩名女兒咘咘及Bo妞上大陸親子真人騷，而令一家四口人氣急升。
(蘋果日報)
