黃心穎同馬國明呢一對情侶，經常被人問幾時結婚，剛剛鄭嘉穎同陳凱琳拉埋天窗，有去峇里婚禮嘅馬國明，會唔會係下一個老襯呢？答案係……
今日喺一個馬國明fans嘅ig度貼咗張相，相中馬國明攬住黃心穎，心中仲晒住一對結婚戒指添。
驟眼睇好容易信以為真，其實係黃心穎早排拍咗個珠寶品牌嘅廣告主題係「結婚之考驗」，呢張相係心穎BB同另一個男model影，只係fans嘅p圖技巧高超，key到張相似層層。
有唔少網友留言，如「想像力好！希望會成真」、「哈哈。我以為是真的」、「你真係p圖神手」等等。
對於呢張似層層嘅結婚相，心穎回覆傳媒話︰「呢位fans近日都不停key馬明嗰樣落我啲相度，第一個反應，佢key相技術好叻，見到大家啲comments仲心急過我，好好笑！」
咁幾時會好事近？佢話︰「拍廣告同現實，我又分得好開嘅，不過如果可以一齊拍（指拍廣告），個感覺一定會更好。」
其實心穎之前講過佢夢寐以求嘅婚禮，係去一個與世隔絕嘅地方，搞一個簡單婚禮，仲要係喺海邊搭個帳篷，配合藍天白雲，加埋有live band，同親友食飯跳舞。
(蘋果日報)
