27歲嘅李蘊已經係一子一女嘅媽媽，前年同廣州商人羅章冠結婚，同年5月誕下囡囡紫晞後，上周三（8月8日）再誕下囝囝，佢仲喺社交網貼上留言，話囝囝出世幾天發現患蠶豆症，黃疸偏高，要照燈。李蘊話大女出世嗰陣都要照燈，感謂：「我們兩姐弟也逃不過要照燈的命運。」
今日李蘊喺佢幫囡囡開嘅Ig，貼咗一張囝囝瞓喺廂入面照燈嘅相，然後用囝囝第一身留言話：「哎呀！醫生仲未放我返屋企啊！好彩媽媽每日都嚟拎奶奶俾我飲！好味道！」
不少網民亦為BB打氣，又有人提李蘊飲木瓜湯會增加黃膽指數，李蘊亦有扮囝囝留言回應：「媽咪話佢冇飲木瓜湯喎！」之後亦有再留言話：「醫生話睇下聽日放唔放細佬返嚟喎！」
除此，李蘊亦喺自己Ig分享餵人奶心得，佢話：「有好多媽媽問點先可以多奶，我唔係專家，但我可以以經驗分享一下。」
經驗如下：
1.首先唔好怕會肥，食多啲飯，飲多啲湯水／炒米茶；
2.勤力餵，埋身餵係最快上奶嘅方法；
3.要同BB多練習，唔好俾佢只吸乳頭，要吸大部分乳暈，如果唔係就好易損，超痛又流血，到時又有藉口放棄人奶㗎喇！
4.睇住仔仔嘅相／影片，奶陣好快就會嚟，係好神奇㗎，個腦控制奶陣（有奶柱噴奶），要成日諗住「囝囝要奶奶」、「囝囝要奶奶」，咁就有奶㗎喇！
5.心情真係好影響奶量，個人唔開心，奶都少好多，要保持好心情，覺得自己係全世界最幸福嘅人，奶路就自然暢通無阻啦！
不過，因為囝囝仍未離開醫院，李蘊仍要每日泵奶，佢留言都有講到：「基於我仔仔照緊燈，就要靠自己手揸啦，我冇用電泵，因為開頭怕泵傷乳腺，只係用暖水按摩乳房後，用接奶神器吸住乳房，睇住佢由一滴一滴至到有奶陣。」BB返到屋企之後，李蘊兩公婆就有排忙喇！加油！
(蘋果日報)
