無綫新劇《解決師》在將軍澳電視城進行探班活動，新加入劇組的唐文龍與早前被傳撻着的楊柳青碰面，他步向楊柳青時突然隔空作狀、扮咀女方，打招呼笑說：「好耐冇見。」事出突然，楊柳青表現尷尬，掩嘴不停傻笑。
狂讚楊柳青
兩人接受訪問時，問文龍是否公開戀情？他邊滴汗邊說：「我哋之前一齊拍詠春片，佢係一個好聰明伶俐、美艷動人、身手敏捷，好好嘅女仔，大家係好朋友。（係咪女朋友？）唔係。（發展緊？）唔係，友誼就發展緊，拍完詠春片之後大家都各有各忙，冇見面。（拍劇可以多啲見？）我哋唔多對手戲，但都唔代表喺廠冇接觸嘅。（接佢收工？）我連佢住邊都唔知，大家真係好耐冇見，遲啲詠春片剪好，再約佢出嚟食飯睇吓，或者到時又再唔小心畀人影到。」在旁的監製劉家豪笑說：「搞掂咗喇。」
拍拖最緊要夾
楊柳青則指事前不知道文龍加入劇組，見面也感驚喜。問文龍是否她喜歡的類型？她笑說：「我自己就鍾意高大威猛、黑黑實實、運動型。」文龍則笑說：「但係啲人成日都話我48歲。」楊柳青笑說：「年紀唔係問題，最緊要夾。」文龍即大讚她識貨。
(on.cc東網)
