Yan今日接受電話訪問，佢話：「其實我上個星期去檢查身體，佢本來要我即時入院，但因為有嘢做，所以延遲咗幾日先入。」
34歲吳日言(Yan)懷孕23周，早前去醫院做檢查，發現血糖過高，醫生建議留院觀察，結果一住便4日。今日佢喺facebook上載新相，笑得好開心嘅佢留言：「這是重獲自由的笑容。話說前幾天在醫院留院觀察血糖指數，去到第四日，真係崩潰，再唔出院我真係會發癲，因為喺醫院真係好悶好悶，幸好終於可以回家。大家不用擔心，我會按時為自己打針，直至BB出世。」
但就喺文尾加hashtag寫「媽媽唔易做」、「媽媽真偉大」、「妊娠糖尿病」、「打針唔洗驚」等字句。
Yan今日接受《蘋果》電話訪問，佢話：「其實我上個星期去檢查身體，佢本來要我即時入院，但因為有嘢做，所以延遲咗幾日先入。」Yan續指，「依家每日要拮七次手指，打四支針，自己學識咗返嚟屋企自己打，但要幾準時打，每餐之前要打，打完就要即刻食，唔係驚會暈。」
Yan留言後有唔少朋友同佢打氣，叫佢加油，佢自己就話都唔係太擔心，因為知道BB無事，純粹因為佢懷孕令荷爾蒙變化有呢個問題，但就要一直打針打到BB出世為止。佢笑住話：「我相信自己頂得住，係要戒食甜嘢慘啲囉，因為都好鍾意食甜嘢，同埋食咗開心啲，其他方面都會食清淡啲，食嘢唔可以過量。」
(蘋果日報)
