陳凱琳（Grace）父母今早十時十五分現身機場，出發到峇里出席囡囡婚禮，陳父連聲感謝大家關心，並接受訪問，佢透露Grace同未來女婿鄭嘉穎噚日已經飛咗去峇里。捨得女兒嗎？陳父笑道：「嫁咗都會喺度㗎嘛！」
印尼連日地震不斷，陳母坦言擔心，陳父就話：「婚禮係個女負責，唔關我事。」至於婚禮形式同賓客數目等問題，佢都係呢句：「全部係佢哋安排，唔到我哋話事，我係被動。」咁，陳父有乜嘢係知道嘅呢？佢就答：「我真係冇乜嘢知。」
有傳Grace之後會喺加拿大補擺婚禮，呢樣陳父就知喇，答案係：No。
咁係咪會喺香港補擺酒？陳父又係呢句：「唔知道。」問到陳父畀未來女婿幾多分？他笑謂：「一定100分。唔係100分都唔畀個女嫁。」
而向來都廿四孝嘅陳母同樣喜歡呢位未來女婿，被問到今次係咪第一次放手？陳母話：「唔係，不嬲佢都有自己做。」
(蘋果日報/on.cc東網)
