48歲鄭嘉穎同27歲陳凱琳會喺嚟緊嘅星期日（8月12日）拉埋天窗，婚禮會喺峇里島嘅Bvlgari Resort Bali舉行，因為只係請咗雙方親友同少部份嘅圈中朋友參加，所以佢哋喺娛樂圈不少合作過嘅朋友都冇份去飲喜酒。
不過呢輪印尼係咁地震，今日旅遊勝地峇里島隔籬嘅龍目島再發生6.2級強烈地震，有多幢建築物倒塌。但佢哋真係勇，明日依然預期出發去峇里島結婚，原來有内情~
其實有份去婚禮嘅親友同圈中朋友都問過嘉穎同Grace會唔會改地方舉行婚禮，因為睇到龍目島發生地震後嘅狀況，大群人想撤離都好狼狽，所以啲賓客其實係有擔心，不過主人家唔驚，佢哋都唯有照去啦！
聽講因為乜都訂好晒，Bvlgari好似會對佢哋婚禮有啲嘢贊助，所以一改地方係有啲煩，希望佢哋可以一切順利啦！下月三（15）係嘉穎49歲生日，原本佢哋諗住結完婚就喺峇里過埋生日，不過依家就要睇下地震嘅最新情況再決定留唔留喺當地過生日同度蜜月。
（apple daily）
