62歲金牌綠葉陳榮峻剛啱再做新郎哥，上月10日與拍拖3年女友、58歲嘅吳香倫結婚，黃昏戀有個圓滿結局。新郎陳榮峻嘅93歲媽媽、三名子女及兩個孫仔，仲有陳榮峻嘅哥哥專登由新西蘭返港為佢證婚，四代同堂，十分熱鬧。
不過結婚當日，《蘋果》收到一封手寫匿名信，長達三頁紙，斥責陳榮峻是「偽君子」。爆料人似乎對陳榮峻家事瞭如指掌，指陳榮峻長子陳穎霖年輕時與一名未成年女子生咗個仔，但婚後不足一年分居，孫仔最初由陳榮峻太太鄭安麗負責照顧，但太太於2010年去世後，陳榮峻以「一屋男人」為由，交畀孫仔嘅何姓婆婆照顧。爆料人稱，當時孫兒年約5歲，而何婆婆本身正進修神學院課程，兩邊奔忙，非常吃力，但最後仍答應照顧。
爆料人續稱，陳榮峻最初都有每月給予一千蚊生活費，但俾咗一年幾就冇再畀。爆料人稱不值其所為：「婆婆住土瓜灣公屋，佢（指陳榮峻）就住馬鞍山獨立屋地下；又有錢成日出埠旅行，但阿爺就一蚊都唔肯去負責，係咪過橋抽板？！」
記者致電陳榮峻了解事件後，佢都好有耐性解釋番件事，承認兒子與前妻已離婚，但並非未成年結婚。佢話：「當年我太太走咗，一個男人，我根本點教，又要返工。所以交畀婆婆湊，咁婆婆係要返學，所以太婆都有幫手湊。」有冇畀贍養費？陳榮峻表示：「可以話冇特定一個費用，佢哋當初離開（分手），女方又冇要求任何嘢，近年佢（大仔前妻）想攞返撫養權，法庭方面都判咗，係零贍養費，所以都唔可以怪我個仔，係大家去傾，而我個仔現在另外都有頭家。」
陳榮峻稱多年來都有為孫仔支付學費：「好老實，我有能力，孫仔讀直資學校我都俾到佢六年班，仲有每月一千蚊。咁佢（大仔前妻）好似（孫仔）三年班攞番撫養權，但我都有俾孫仔小學開學買書簿、校服同過年買衫錢，係到佢中一之後就冇畀，孫仔今年好似讀中二喇。」問到係咪經濟出現問題？陳榮峻嘆謂﹕「我經濟都OK，但講實話，關我哋老人家咩事吖？！」
陳榮峻坦言與孫仔嘅婆婆關係良好:「我到依家都係叫佢襯家，結婚當日，孫仔婆婆同太婆都有嚟飲，如果關係唔好點會嚟？」問到知唔知係咩人寄匿名信？陳榮峻掛線後一會再回覆﹕「我都有同襯家了解，佢話估到係咩人做，估計係教會一位好鍾意理事嘅人，但已冇聯絡，婆婆仲叫我唔使理。」
(蘋果日報)
