庾澄慶(哈林)上月台灣傳媒爆佢將會再做爸爸，當時佢嘅經理人就話無法回應，日前哈林就認咗太太張嘉欣懷了第二胎，今日佢喺台灣出席活動時，就公開佢嘅生仔秘方。
年屆57歲嘅哈林，去年太太張嘉欣為佢誕下一女「哈蜜瓜」，日前佢就承認太太再度懷孕，兩年抱兩，真係可喜可賀！今日佢出席戒煙公益活動，講到生仔秘方，哈林就話戒煙25年神清氣爽，一直「硬朗」到o依家。佢再話：「這種事能教嗎？只有一招就是『戒煙』。」
連同佢同前妻伊能靜所生嘅囝囝，哈林即將迎接第三個小生命，問到佢可需要延遲退休？佢就好坦白咁話自己冇經濟壓力，仲話自己將會停工陪產，至於會否考慮結紥？哈林就話：「 等塵埃落定再來研究。」已有一仔一女嘅哈林，被記者問到今胎BB嘅性別，佢就大賣關子：「暫時不方便告訴大家，反正（生肖）屬狗。」
被問到1歲多嘅囡囡「哈蜜瓜」會講些什麼話？哈林話：「只會叫爸爸。」至於大仔小哈利知道家中再添新成員，哈林話囝囝都替佢感到驕傲，並透露小哈利好有藝術天份，經常送畫作俾佢，仲好開心話阿仔送乜俾佢都好。今日係台灣父親節，哈林話打算做完運動，就會一家人喺屋企食飯慶祝，避開人潮喎！
(蘋果日報)
