【係咁食重咗40磅】開心宣布BB性別!

    「6年之後,又係佢同我影呢次大肚寫真,就好似番返去6年前自己仲係花樣年華少女咁,估唔到今日已經係兩個小朋友嘅媽媽,真心覺得好感觸。」

    電影《一路向西》33Co靚模、31歲嘅郭穎兒(Celia K.)前年嫁畀圈外老公李冠鋒,舊年生咗囡囡李明芯,囡囡已經1歲幾,Celia再懷第二胎,預產期係下個月。Celia係咁食養胎,未生都已經重咗40磅,o依家重到145磅,佢仲畀老公嘲笑佢變咗「企鵝」,Celia呢胎都有影大肚寫真,仲要係超級性感造型。

    Celia喺12年出過處女寫真集《Missing Celia K》,充滿少女味道,o依家陀第二胎影嘅大肚寫真,卻散發出女人味,佢今次以黑白透視造型,凸顯巨肚,谷上圍勁升cup。

    Celia今日接受《蘋果》電話訪問時話:「6年前,呢個攝影師 幫我影咗人生第一次寫真,6年之後,又係佢同我影呢次大肚寫真,就好似番返去6年前自己仲係花樣年華少女咁,估唔到今日已經係兩個小朋友嘅媽媽,真心覺得好感觸。」

    Celia話生埋呢胎就封肚,唔通佢呢胎陀仔,可以收工?Celia話:「陀女呀,不過老公鍾意女,佢冇所謂。」Celia亦無意再追,換句話說阿鋒將有一大兩小情人,Celia即話:「係呀,我冇地位㗎啦。」

    (蘋果日報)

    SHARE