半夜穿羊水入醫院，兩公婆跌跌撞撞趕住「走佬」，見菲傭姐姐房間嘅燈開住，但係竟然完全冇出房幫忙，問都唔問，不過終極令佢決定唔再請呢位家傭嘅係佢第一晚出院。。。
無綫節目《東張西望》主持人梁麗翹（Nicole）於5月時誕下B女Nanette，依家專心湊女，得閒就update吓社交網，早前先同大家分享要正能量湊B，做個好榜樣畀BB睇，母愛盡現。不過今日佢就自爆暫別幕前而親自湊女係有原委……
佢喺社交網甫出長文，指佢同老公本身都想請「外援」幫手，囡囡未出世就已經請咗個履歷啱晒心水嘅家傭，諗住對方可以早啲適應，盡快融入佢哋，點知一見真人就出事！呢位菲傭姐姐原來唔識煮飯、做家務，最後係Nicole老公煮埋畀佢食，而對方又唔識照顧BB，好似唔識洗奶樽、唔睇洗衣液說明等，不過最過分係Nicole半夜穿羊水入醫院，兩公婆跌跌撞撞趕住「走佬」，見菲傭姐姐房間嘅燈開住，但係竟然完全冇出房幫忙，問都唔問，搞到Nicole自己都大嗌失望。
不過終極令Nicole決定唔再請呢位家傭嘅係佢第一晚出院，BB同菲傭姐姐同房，當時BB喊，Nicole抱咗BB出去餵奶之後，對方問佢：「可否閂咗道門？」嗰一刻Nicole嘅心情，大家可想而知……
依家囡囡Nanette就嚟三個月，Nicole就話自己湊B雖然辛苦同困身，但變相睇住BB成長嘅機會，而兩公婆又向同一方向努力學習，感情更勝從前呀！Nicole，加油！
(on.cc東網)
