關心妍今日在灣仔會展BB展覽，出席其代言人宣傳活動，與一眾新手媽媽及孕婦分享生bb經歷，在現場見到小朋友愛心爆棚。
回想當年懷孕期間，關心妍話：「因為唔使工作完全冇壓力，食完嘢就瞓覺，反而生完BB之後換片、沖涼咩都唔識，雖然有陪月，但屋企好多人，有兩日突然情緒崩潰控制唔到，暱埋咗入房，自己有信仰跪低祈禱，喊咗半個鐘釋放出嚟，之後充滿力量。屋企人初頭都唔知，後來老公都問咩事， 大家都未湊過小朋友，我哋又等咗咁多年，有咩閃失擔當唔起，好彩之後無事。」 關心妍仲話補身都好重要，坐月食咗幾斤米， 健康好情緒都會好。
關心妍女兒Jovia下個星期就會上學前班，已經為女兒作好準備 ，女兒上學前班後，關心妍就可以每日騰出三小時打理其開設音樂學院 ，早前佢親自單對單教學，一堂接一堂，連飲水同去廁所都冇時間，現時會識得調教。
歌手盧凱彤的死訊震驚樂壇，與她同期出道的關心妍，今日在灣仔會展出席活動時，對於盧凱彤今早突然墮樓逝世，關心妍獲悉後目瞪口呆。
她透露：「我哋同期新人合作，一路欣賞對方音樂，聽到呢個消息好突然，完全冇諗過，知道佢有抑鬱症，所以點解我成立音樂學院，就係想幫助有需要嘅人，尤其係圈中人，抑鬱真係傷害咗好多人，有時不由自主，有呢個病要去睇醫生，發現朋友有異樣都要多加關心，伸出援手。暫時唔知對方係乜嘢原因，如果真係有抑鬱係可大可小，病情好返後又可能會反覆，康復後都要留意，要多啲分享唔好收埋自己，希望佢嘅靈魂可以rest in peace.」
(apple daily)
