楊思琦01年選完港姐，即加入娛樂圈，同過李泳豪拍拖9年，直到11年佢突然宣佈分手，激到李泳豪父母李家鼎同施明紮紮跳。之後思琦同吳帥發展咗段短暫嘅感情，12年仲突然暫停工作，遠赴美國，未婚誕下女兒楊卓穎（Krystal）。
成為咗單親媽媽，楊思琦呢幾年一直努力賺錢，Krystal都看在眼內，日前楊思琦接受商台節目《1圈圈 星光背後》梁泰來訪問，被問到Krystal有冇打探過爸爸嘅資訊，思琦就坦言女兒一早知道「冇爸爸」呢回事，仲一早已經同女兒解釋過好幾次：「佢思想好成熟，會明白嘅。」
學生讀書時，總有個課題叫做「我的家庭/媽媽/爸爸」之類，楊思琦就話女兒懂事：「自幼稚園開始，佢被問及家庭有乜成員，要畫出嚟、說出嚟，佢都知道我哋係冇爸爸呢個角色的。所以我哋屋企人就盡量俾多啲愛佢，關心多啲。若將來佢想知道生父係邊個，我都會講，呢個係好正常嘅事。」
楊思琦亦有透露，誕女後一直都有追求者，單親媽媽呢個身份冇成為佢感情發展嘅阻力，其中仲有啲追求者有經濟條件供養佢兩母女，不過思琦就覺得，如果可以，都係自己搵錢去養大女兒更有意義。
(蘋果日報)
