問到楊卓娜會否教對方生仔心得，已有一女的她笑言：「我識生女，唔識生仔喎！」見楊怡面部長滿暗粒，她解釋是皮膚敏感：「已經好番好多，之前敏感到成面紅晒，唔可以周圍去，去探（老公）班都唔得，皮膚敏感好長手尾。」
藝人楊怡與胞姐楊卓娜以姊妹檔上陣出席奶粉活動，問到楊怡是否有好消息要宣布？她笑言希望很快會有，但老公羅仲謙忙於工作，沒有時間造人：「佢之前唔喺香港，去咗拍電影三個月，啱啱先至返嚟。休息一陣，佢又要離港開工，我都有嘢做，大家時間未必夾到，不過呢啲冇得催，冇得急。（係咪已經ready做媽咪？）心理上係，但順其自然。（大家夾時間休息？）希望嚟緊有時間，我哋要夾吓時間表。」
楊卓娜想拍古裝《BB》
另外，談到楊卓娜有份演出的劇集《BB來了》今晚大結局，她表示：「希望收視過30點，已經好開心，35點就更加好。如果過50點就全香港巿民一齊食飯，大家自己畀錢食飯，哈哈！（劇集係happy ending？）唔知呀！（你喺劇中最後會同徐榮一齊？）冇必然。」
至於問到會否想開拍續集？她坦言想原班底拍攝另一個題材，並提議可能是古裝版《BB來了》。問到屆時她要由陪月變奶媽？她笑謂：「做奶媽囉，可以整大個胸（去演），或者做『媽姐』。」
(on.cc東網)
