台灣藝人徐熙媛（大S）與丈夫汪小菲最近參演內地真人騷《幸福三重奏》，兩人喺鏡頭前恩愛又搞笑，簡直羨煞旁人！其實汪小菲不但係一個好老公，而且仲係一個勁錫仔女嘅老竇。一向相當保護仔女嘅佢，呢日喺微博罕有晒出4歲大女「小玥兒」嘅正面相，仲留言：「玥兒的小夥伴叫小米，玥兒長大了，她們還是好朋友。」
汪小菲一次過上載咗兩張相，但就冇明示邊位相中人先至係女兒，搞到唔少網友紛紛喺度競猜，有人將第一張細路女相同當年大S演出「杉菜」嘅相作出對比，結果發現兩人五官相似，簡直係複製人一樣，網友仲留言：「mini版杉菜」。
不過亦有人估第二張細路女相其實都係小玥兒，留言指：「我看第二張覺得好像爸爸啊」。
另外，有網友就突破盲點，指小玥兒個同伴其實係佢身邊隻銅像松鼠，並指出兩張相嘅細路女都係小玥兒，只係唔同成長階段嘅佢！
(on.cc東網)
