天下𤓓人何其多，身邊總會有一個，大家可曾做過𤓓爆事？如搭車職員證當八達通「嘟」，着錯鴛鴦襪出街，甚至倒轉衫着咗出街，咁有冇人試過去錯婚禮咁爆呢？樂隊Yellow!成員何兆基（基基）原來試過，基基在社交網自爆瘀事，指「人生on居事，莫過去人哋婚宴早咗一日，去到酒店樓下仲竟然撞埋新郎哥同埋佢啲兄弟行過…。」你話悲不悲哀？
基基接受訪問時也不介意詳述其「on居事」：「我一路都記錯咗啤梨（葉文輝）係7月27號結婚，因為好早之前佢係講過27號嘅，可能佢後尾改咗28號啦，佢係有畀帖我嘅，不過我又冇睇到，咁我一路都記住27號，27號又好多嘢做，做完立即就跑去酒店參加婚禮，初時仲怕遲到，但原來仲早到咗，咁我咪喺大堂度等咗陣，發現唔對路咪問吓啲酒店職員，個職員就問我係咪葉先生啲兄弟，係兄弟就上房傾，我先知原來早到咗一日。」
基基「瘀爆」後便在大堂打機hea一陣，不料仍被人發覺：「啤梨啱啱同兄弟團行過，我已經耷低個頭，但又被EO2個Eddie發覺喎，仲問我做乜喺度，我咪承認自己記早咗一日囉。」
去到酒店都未發現問題。
他又說不少圈中人留言笑他，其中啤梨更公開感激他：「原來你咁重視我㗎？」他唯有回覆：「我不嬲都咁重視你，重視到早一日嚟賀你。」
(on.cc)
